sábado, 3 de decembro de 2016

Nova páxina: Histórico

Catro anos de andanza van xa dende o 2012!!

Nus días Musicreques vai estar de aniversario e queremos celebralo con vós cunha páxina nova no blog. Na pestaña de Histórico (arriba e á dereita) podedes ver todos os lugares onde actuamos, os programas, festivais ou ciclos nos que participamos e os centros educativos para os que fixemos sesións didácticas. Esperamos que vos sexa de interese!



Por certo, xa temos 250 seguidores na nosa páxina de facebook! Se non a coñecedes podedes visistala para ter toda a información das nosas actuacións.

Musicreques actuou no Apego de Ourense

Onte actuamos no Auditorio de Ourense dentro do programa Apego. Representamos "O Quebranoces para bebés" para unhas cen persoas entre pais, nais e rapaciños pequerrechos.

Os nenos estiveron moi participativos e acompañáronnos en todas as nosas propostas de música e movemento. Despois achegáronse a tocar as campás que tanto lles chamaron a atención e viñeron a saudar a Quebranoces. 

Foi un pracer poder visistar Ourense cun dos nosos espectáculos. Ata a próxima.


martes, 29 de novembro de 2016

Páxina de Facebook

Temos novidades en Facebook. A nosa páxina cambiou de nome para poder localizala mellor e facer máis clara a nosa actividade profesional. Agora só tedes que poñer Musicreques no buscador de facebook e xa vos aparece.


Nesta páxina publicamos todas as datas e os lugares das actuacións de Musicreques e podedes ver fotos e videos dos nosos espectáculos. Se non coñecedes a páxina de facebook de Musicreques recomendámosvos que a visitedes e que vos fagades seguidores da páxina para que nos vos perdades ningunha novidade. Podedes ir pinchando directamente neste enlace.

https://www.facebook.com/Musicreques/

Polo cambio de nome é posible que, nuns primeiros días, non apareza en Google a páxina nova e non a atopedes se a buscades polo nome anterior. Disculpámosnos polas molestias que vos poida causar esta situación e esperamos que dentro de pouco a podades atopar con máis facilidade.

venres, 28 de outubro de 2016

O sábado 5 de novembro estaremos en A Coruña


O próximo sábado 5 de novembro Musicreques actúa ás 12:00 na sede de Afundación de A Coruña, dentro do Festival Sea Sons organizado pola Asociación Cultural Tres por Cuatro e MusicArte.

O espectáculo que poderedes ver será Iván e o lobo gris. Lembrade que a derradeira vez que o representamos na Coruña, no Museo de Arte Contemporáneo (MAC), quedou moita xente sen poder gozar do espectáculo porque houbo moita afluencia de público. Desta vez haberá que mercar entrada, pero esperamos ter moito público tamén, así que vos recomendamos non o deixedes para o último momento.

Comunicounos a organización do Festival que a entrada (5 euros) é válida para un adulto e dos e dos nenos. Poñémosvos aquí o enlace para comprar as entradas: Ataquilla

Invitámosvos tamén a asistir ás outras actuacións ofertadas no festival. Seguro que van estar fantásticas.

 

martes, 13 de setembro de 2016

Actuacións nos colexios no 2016-17

Algúns colexios estanse xa a poñer en contacto ca Asociación Musical Musicreques para concretar datas de actuacións nos seus centros educativos, pero lamentablemente témosvos que informar que este ano a Asociación non vai poder actuar polas mañás de luns a venres por circunstancias persoais.

Esperamos retomar a nosa actividade nos coles durante curso académico 2017/18. Ata entón esperamos podervos ofrecer os nosos espectáculos noutras datas e espazos.

xoves, 1 de setembro de 2016

Voltamos ao traballo

De volta ao traballo depois destas datas. 

Esperamos nos próximos meses deixar atrás toda a tristura que nos acompañou este 2016 polo falecemento dos pais de Loreto e comezar esta nova temporada de novo con ilusión e novos proxectos.

O espectáculo do Carnaval dos animais vai adiante pero moito máis amodo do que nos queriamos así que Musicreques decidiu que, para non vos ter esperando demasiado por un novo espectáculo, imos facer outro conto que esperamos ter listo para xaneiro ou febreiro. 

A historia vai dunha fraga, unha duquesa que quere convertela nun campo de golf e un teimudo leñador que non lle vai poñer as cousas moi doadas á duquesiña... ou tal vez si... porque o pobriño vai perder a cabeza por ela. A música que vai acompañar esta vez o conto vai ser a fermosa música das danzas húngaras de Johannes Brahms, interpretadas a catro mans.


xoves, 9 de xuño de 2016

Musicreques actuou con moito sol e público no I Castelo Folk

A actuación de Musicreques do pasado sábado no I Castelo Folk, ao pé do Castelo dos Andrade estivo acompañada de moito sol e público. Pasámolo xenial actuando, mais tamén cas outras actuacións, talleres, etc.





Agradecemos á ACRM Xente de aquí e acolá de Nogueirosa que contase con nós para participar nesta velada tan especial.

luns, 23 de maio de 2016

Musicreques participa no I Castelo Folk de Pontedeume

O próximo sábado 4 de xuño terá lugar o I Castelo Folk na localidade de Pontedeume. Este festival está organizado por ACRM Xente de aquí e de acolá de Nogueirosa e terá un montón de actividades incluíndo una actuación de Musicreques.



Representaremos "Iván e o lobo gris" ao aire libre nos arredores do Castelo de Andrade aproximadamente as 17:00 ou 17:30. Non volo perdades!

martes, 8 de marzo de 2016

Musicreques tivo moitísimo público na representación no MAC

A afluencia de público para a sesión de Iván e o lobo gris que fixemos o pasado domingo no MAC de A Coruña foi tan numerosa que moita xente tivo que dar volta para casa porque o aforo estaba cheo xa media hora antes de que empezara a representación. Duascentas cincuenta persoas presenciaron as aventuras e desventuras de Iván pero alomemos outras cen quedaron fora por falta de espazo. Sentimos moitísimo que tantos rapaciños se decepcionaran por non poder ver aos simpáticos personaxes do conto e esperamos ter ocasión de volver pronto a Coruña para poder compensalos.

Foi todo un pracer interpretar as Danzas Eslavas de Dvorak en un estupendo piano Yamaha e actuar para un público tan atento e participativo.


Querémosvos agradecer que vos achegásedes ao término do conto para felicitarnos pola representación e facernos saber cantos vos gustou e, especialmente, agradecer tamén a Nicky pola gran axuda que nos prestou. Dende aquí enviámoslle un saúdo e os nosos desexos para que teña tamén moito público na súa representación de monicreques este próximo fin de semana no Teatro do Andamio.

martes, 1 de marzo de 2016

Musicreques actúará este domingo nos concertos didácticos DO, RE, BIP do MAC

Fainos moita ilusión comunicarvos que Musicreques actuará o este domingo 6 de marzo ás 12:30 nos conciertos didácticos Do, Re, Bip do Museo de Arte Contemporáneo Gas Natural Fenosa (MAC) de A Coruña. A entrada é libre ata completar aforo así que vos recomendamos cheguéis con tempo dabondo. Representaremos o conto de "Iván e o lobo gris" cos nosos amigos monicreques e interpretaremos a fermosa música de A. Dvorak ao piano.

Se non coñecedes o espectáculo podédevos informar neste link : Iván e o lobo gris


Esperámosvos!

xoves, 11 de febreiro de 2016

Novas da actividade de Musicreques

Alégranos anunciarvos que, tras estas complicadas datas nas que a nosa actividade paralizouse por unha situación familiar grave, Musicreques volve a acción.

Empezaremos por retomar a manufactura dos nosos monicreques para o próximo espectáculo que andamos a preparar. Para aqueles que non vos decatedes de cal é, lembrámosvos que xa comezamos hai uns mesiños con "O carnaval dos animais" ca fermosa música de C. Saint-Saëns. Polo de agora temos uns cantos animais xa feitos e parte da música xa estudada así que, a non ser que xurdan novos imprevistos, contamos que teremos todo listo para a seguinte temporada. 

Compartimos con vós unha foto dalgúns dos animas aéreos (galiña e poliño, paxaros) e acuáticos (estrela e cabaliño de mar). Outro día ensinarémosvos o león, o elefante ou a tartaruga...


A que o paxariño azul ten un poco cara de lelo? esa era a nosa idea cuando o fixemos.... Pero non vos imos contar o por que, teredes que esperar a ver o espectáculo.

Por certo. Temos boas novas para os nosos seguidores da cidade de A Coruña que levan tempo reclamándonos unha actuación na cidade. O domingo 3 de abril ás 12:30 interpretaremos "Iván e o lobo gris" no ciclo de Concertos didácticos DO-RE-BIP do Museo de Arte Contemporáneo (Mac) Gas Natural Fenosa.